दमौलीमा जन्मदिनको भोज खाँदा १५ जना बिरामी

कनिका खबर
कार्तिक २, तनहुँ
दमौलीको व्यास १२ छिर्कनेमा जन्मदिनको भोज खाएका १५ जना बिरामी परेका छन् । जन्मदिन मनाउने क्रममा केक, कुखुराको मासु र तरकारी खाँदा छिर्कनेका एकै परिवारका १२ जना सहित १५ जना बिरामी परेका हुन् । स्थानीयवासी ११ वर्षका प्रज्वल गैह्रेको जन्मदिनमा शनिबार राति भोज खाँदा १५ जना बिरामी भएका हुन् । हिजो राती भोज खाएका उनीहरूलाई राती नै झाडपखाला र बान्ता आउने भएको थियो । आईतबार बिहानै टाउको दुख्ने, वाकवाकी लाग्ने र ज्वरोसमेत आउन थालेपछि दमौली अस्पतालमा उपचारको लागि भर्ना गरिएको हो । बिरामी मध्ये २ जना उपचार पश्चात डिर्चाज भएको अस्पतालका स्वास्थ्यकर्मी मदन गौतमले जानकारी दिनुभयो ।