एजेन्सी /
अमेरिकी औषधि निर्माता कम्पनी फाइजरले निर्माण गरिरहेको कोरोनाभाइरसविरुद्धको सम्भावित खोपको तेस्रो चरणको परीक्षणको अन्तिम मूल्याङ्कनमा उक्त खोप वृद्धहरुमा समेत भाइरसको संक्रमण रोक्न ९५ प्रतिशतसम्म प्रभावकारी देखिएको कम्पनीले बुधबार बताएको छ ।
कम्पनीले परीक्षणमा सहभागी १७० जनामा स्वयम्सेवकमा कोरोनाभाइरसको संक्रमण देखिएको जनाएको छ । त्यसमध्ये १६२ जना संक्रमितलाई प्लसेवो वा सलाइन दिइएको थियो भने ८ जनालाई वास्तविक खोप दिइएको थियो । यसले खोप ९५ प्रतिशत प्रभावकारी पाइएको फाइजर कम्पनीले जनाएको छ ।
‘परीक्षणका दौरान १० जनामा कोभिड–१९ को गम्भीर लक्षण देखिएको थियो जसमध्ये ९ जना सलाइन प्रयोग गरिएका थिए भने एक जना बीएनटी१६२बी२ खोप लगाएका समूहका थिए,’ विज्ञप्तिमा भनिएको छ । बीएनटी१६२बी२ खोपका लागि दिइएको प्रयोगात्मक नाम हो ।
पहिलो डोज खोप दिइएका २ प्रतिशत र दोस्रो डोज दिइएका ३.७ प्रतिशतमा सामान्य साइड इफेक्ट देखिएको र धेरै उमेरमा भएकामा कम र हल्का साइड इफेक्ट देखिएको बताए ।
एक स्वतन्त्र समूहले पनि कम्पनीको परीक्षण र साइड इफेक्टलाई अध्ययन गरिरहेको छ । हालसम्म खोपबारे कुनै गम्भीर सुरक्षा चासो नपाइएको कम्पनीले जनाएको छ ।
पछिल्लो नतिजा प्राप्त भएपछि फाइजरले खोपको आपत्कालिन प्रयोगका लागि अमेरिकी फूड एन्ड ड्रग एडमिनिस्ट्रेसनसँग केही दिनभित्र अनुमति लिने जनाएको छ । आफूले प्राप्त गरेको तथ्यांकलाई विश्वभरका नियामक निकायहरुलाई पनि प्रदान गरिने कम्पनीले जनाएको छ । फाइजरले यो तथ्यांकलाई वैज्ञानिक जर्नलमा पनि प्रकाशित गर्ने योजना रहेको जानकारी दिएको छ ।
बायोएनटेकका सहसंस्थापक तथा कार्यकारी अध्यक्ष डा. उगुर साहिनले खोपले प्रदानले तीव्र गतिको सुरुक्षा अहिलेको महामारी रोक्नलाई महत्त्वपूर्ण औजार बन्ने विश्वास व्यक्त गरे ।
तेस्रो चरणको क्लिनिकल परीक्षण गत जुलाइ २७ मा सुरु भएको थियो । फाइजरका अनुसार ४३ हजार ६६१ जनाले यसका लागि आवेदन दिएकोमा ४१ हजार १३५ जनाले खोप वा प्लेसेबोको दोस्रो डोज प्राप्त गरेका थिए । यता, एफडीएले दोस्रो डोज लिएका खोप लिएका स्वयम्सेवकको कम्तिमा दुई महिनाको तथ्यांक माग गरेको छ ।
कम्पनीले स्वयम्सेवकहरुमा विविधता ल्याउने प्रयास समेत गरिएको जनाएको छ । यसमा ४२ प्रतिशत विश्वभरका सहभागी र ३० प्रतिशत अमेरिकाका सहभागी रहेको र उनीहरुको जातीय विविधता रहेको बताइएको छ । अमेरिका, जर्मनी, टर्की, दक्षिण अफ्रिका, ब्राजिल र अर्जेन्टिनाका १५० क्लिनिकल ट्रायस साइटमा यसको परीक्षण गरिएको थियो । आगामी दुई वर्षसम्म यसको प्रभावकारिता र सुरक्षाबारे तथ्यांक लिइने कम्पनीले जनाएको छ ।
कम्पनीले २०२० सम्म खोपको ५ करोड डोज र सन् २०२१ सम्ममा १.३ अर्ब डोज उत्पादन गर्न सकिने बताएको छ । कम्पनीको अमेरिकामा सेन्ट लुइस, कालामाजु, मिसिगन, मासाचुसेट्स र एन्ड्रोभरमा उत्पादन युनिट र थप एक बेल्जियमको पुर्समा रहेको छ ।
यद्यपि, धेरै राज्यले फाइजरको खोपको संवदेनशीलतामा चासो व्यक्त गरेका छन् । कम्पनीले उत्पादन गरेको खोप माइनस ७५ डिग्री सेल्सियसमा राख्नुपर्छ जुन सामान्यरुपमा उपलब्ध फ्रिजरको क्षमताभन्दा धेरै माथि हो । तर, कम्पनीले उपलब्ध गराउने प्याकेजिङले यसमा सहयोग गर्ने बताएको छ ।
