कात्तिक ४, काठमाडौँ ।
राष्ट्रपति विद्यादेवी भण्डारीले अविरल वर्षाका कारण मुलुकका विभिन्न भागमा आएको बाढी–पहिरो र डुबानले भएको जनधनको ठूलो क्षतिप्रति गहिरो दुःख व्यक्त गर्नुभएको छ ।
राष्ट्रपतिको कार्यालयले आज जारी गरेको विज्ञप्तिअनुसार प्रकोपपीडितहरूको उद्धार तथा व्यवस्थापन, घाइतेहरूको उपचार, राहत वितरण र बेपत्ता भएकाहरूको खोजीकार्यमा राज्यका संयन्त्रहरूलाई परिचालित गराउने कार्यमा सम्बद्ध निकायको ध्यान पुग्ने उहाँले विश्वासव्यक्त गर्नुभएको छ ।राष्ट्रपति भण्डारीले अविरल वर्षाका कारण धानबालीमा क्षति ब्यहोरेका किसानलाई राहत र क्षतिपूर्ति दिन पनि आग्रह गर्नुभएको छ ।
नष्ट भएको धानबाली र विभिन्न भौतिक पूर्वाधारको राहत, क्षतिपूर्ति र पुनर्निर्माणमा समन्वय गर्न आग्रह पनि उहाँले आग्रह गर्नुभएको छ । यस्तै राष्ट्रपति भण्डारीले सम्पूर्ण राजनीतिक दल, सामाजिक सङ्घसंस्था र समुदायलाई आवश्यक समन्वय र सहकार्यसहित पीडितहरूको उद्धार तथा राहत कार्यमा संलग्न हुन पनि आग्रह गर्नुभएको छ ।
