कनिका खबर
असार १९, दाङ ।
दाङ जिल्लामा सङ्कलित स्वाब जिल्ला बाहिर बठाउन थालिएको छ । राप्ती स्वास्थ्य विज्ञान प्रतिष्ठानले स्थानीय तहको स्वाब परीक्षणका लागि शुल्क मागेपछि जिल्लाका तिन पालिकाहरुले स्वाब नेपालगञ्ज पठाएका हुन् ।
संघीय र प्रदेश सरकारको सहयोगमा पिसिआर मेसिन राखेर प्रतिष्ठानमा स्वाब परीक्षण हुँदै आएको थियो । प्रतिष्ठानले आर्थिक कारण देखाउँदै निशुल्क स्वाब परिक्षण गर्न नसकिने बताएको थियो । प्रतिष्ठानको यस्तो निर्णयपछि दाङका १० वटै पालिकाहरुले विकल्प खोजेका हुन् ।
पालिकाहरुले नेपालगञ्ज, भैरहवा र काठमाडौमा स्वाब पठाउने तयारी गरेका छन् । प्रतिष्ठानले निशुल्क परीक्षण गर्न नमानेका तुलसीपुर उपमहानगरपालिकाका १ सय ७९, बबई गाउँपालिकाका ५३ र शान्तिनगर गाउँपालिकाका ३६ जनाको स्वाब नेपालगञ्ज पठाइएको तुलसीपुरका कोभिड फोकल पर्सन विमल केसीले जानकारी दिए ।
