सुबास चौलागाई
भदौ ५, भक्तपुर ।
भक्तपुरको मध्यपुर थिमि नगरभित्रका कोरोना संक्रमितको विवरण सामाजिक सञ्जालमा सार्वजनिक भएको छ । विश्व स्वास्थ्य संगठनले विश्वव्यापी रुपमा तयार गरेको मापदण्ड अनुसार सङक्रमितको विवरण गोप्य हुनुपर्ने भए पनि मध्यपुर थिमि नगरभित्रका सङक्रमितको नाम र ठेगानासहितको विवरण सामाजिक सञ्जालमा सार्वजनिक भएको हो । विवरण कसरी सार्वजनिक भयो भन्ने विषयमा बुझ्न खोज्दा कुनै निकायले जानकारी दिएको छैनन ।
यद्यपि नगरपालिकाले छानविन गरी दोषीलाई कारवाही गर्ने जनाएको छ । नामसहितको विवरण सार्वजनिक भएकोबारे आफुलाई जानकारी नै नभएको जिल्ला स्वास्थ्य कार्यालय भक्तपुरका प्रमुख कृष्णबहादुर मिझारले बताए । उहाले यस बारेमा छानविन गर्ने बताउनुभयो । सङक्रमितको नामसहितको विवरण सार्वजनिक हुनु गम्भीर लापरवाही भएको मध्यपुर थिमि नगरपालिकाका प्रमुख मदनसुन्दर श्रेष्ठले बताए । उनले जनप्रतिनिधिको सामुहिक म्यासेन्जर ग्रपबाट सार्वजनिक भएको हुनसक्ने जानकारी दिँदै यसबारेमा छानविन हुने बताए ।
