कविता – Kanika Khabar
Saturday, July 12Nepali News Portal

कविता

    मा प्रकाशित


प्रिय
तिम्रा लागि गुलावहरु टिप्न लाग्दा
बिझेका काँडाका घाउहरु
बेला बेलामा अझै चस्किरहन्छन्
अनि मलाई झस्काईरहन्छन्
तिम्रो पिरती पोखिएका
ति कागजका टुक्राहरुले
तिम्रा ति प्रेमपत्रहरुका डुङ्गा बनाएर
मेरो मनको शान्त समुन्द्रमा
शयर गराईदिएँ
मिठा स्मृतिका छालहरु सँगै
लहरिँदै लहरिँदै तैरिरहन्छ
अनि क्षण भरमै उचालिन्छन्
भक्कानिएका भावनाका ज्वारभाटाहरु
जसले हुत्याइदिन्छ किनारामा
खियाउने पाता नभएको कागजी डुङ्गालाई
त्यो किनारा जहाँ कुनैबेला ठडिएको थियो
तिम्रो र मेरो पिरती मौलाएको
बालुवाको भव्य सुन्दर शहर
त्यो गुमनाम शहरका
सुनसान गल्लीहरूमा
एकछिन एक्लै टहलिएँ, भड्किएँ अनि भौतारिएँ
तिम्रा यादहरुका बुई चढेर
तिम्रो स्पर्श महसुस गरेँ
मेरो मनको शान्त समुन्द्रमा
हठात् आइदियो तिम्रो बिश्वाघातको सुनामी
जहाँ ढल्यो हाम्रो सुन्दर शहर
अनि उत्तानियो त्यो कागजी डुङ्गा
यत्तिकैमा टुङगियो मेरो स्मृतिको यात्रा
अनि तिमी प्रतिका मेरा भावनाहरु
सदाका लागि विलीन भए ति बालुवामा

***********

"कनिका खबर डट कम"

यो नेपाली भाषाको डिजिटल पत्रिका हो । हामी तपाईंहरूका सामु छुटै महत्वको साथ समाचार पस्कदै छौँँ । हामी सधैं तपाईंको रचनात्मक सल्लाह र सुझावको अपेक्षा गर्दछौं । हामीलाई पछ्याउनुभएकोमा धन्यवाद । हरपल तपाईंको समाचारको साथी कनिका खबर  [Email : [email protected]]

     
प्रतिक्रिया दिनुहोस्