गणतन्त्रको मन्दिरमा
जब खेल्न थालिन्छ सत्ताको अवैध खेल
प्रजातन्त्रको पाठेघरमा
जब हुर्कन थाल्छ कूटनीतिको आतङ्की बिरुवा
बाटोलाई पटक्कै मन पर्दैन जब पाखण्डी पाइला
माटोलाई पटक्कै मन पर्दैन जब सामन्ती गन्ध
संविधानले जब चिम्लिदिन्छ आँखा
झन्डाले देख्दैन पसिनाको रङ
लालफिताशाही जब कुल्चेर हिँड्छन्
सर्वहारा सरिसृपका अङ्ग अङ्ग
सत्ताका भीमकाय आँखाले जब देख्न छाड्छन्
भुइँफुट्टा जीवहरू
इतिहासका हातले जब लेख्न छाड्छन्
अपठ्यारा अक्षरहरू
सतहबाट बलजफ्ती उखालिएपछि
विस्थापित विच्छिन्न पाइलाहरू जब
भोकको पुल्टो बालेर हिँड्छन् जङ्गल जङ्गल
अनि चौकीलाई देख्छन् दुस्मन दुस्मन
जन्मन्छ एउटा बेनामी क्रान्ति।।।
शोषकको छात्ती भेद्न जुर्मुराउँछ जङ्गली तीर
हावामा जताततै फैलिन्छ बारुदी गन्ध
परम्पराको सुविधायुक्त राजमार्गमा
दुर्घटनाग्रस्त बन्छ कपटी इतिहास
अनि छिया छिया हुन्छ समयको घमण्डी विचार
सत्ताले भन्छ जङ्गलवाद
मिडियाले भन्छ नक्सलवाद।
**********
