जोकोभिच विम्बल्डन टेनिसको फाइनलमा

साविक विजेता नोभाक जोकोभिच विम्बल्डन टेनिसको फाइनलमा प्रवेश गर्नुभएको छ । लण्डनमा गयरराति भएको खेलमा क्यानडाका डेनिस शापोभालोभलाई पराजित गर्दै जोकोभिच उपाधि नजिक पुग्न्ुभएको हो ।

विश्व नम्बर एक खेलाडी समेत रहनुभएका सर्बियाका जोकोभिचले डेनिसलाई ७–६ (७–३), ७–५ र ७–५ को सेटमा पराजित गर्नुभएको हो । यससँगै पाँच पटक च्याम्पियन जोकोभिच सातौं पटक विम्बल्डनको फाइनलमा प्रवेश गर्न सफल हुनुभएको छ । जोकोभिचले पछिल्लो पटक २०१९ मा विम्बल्डनको उपाधि जित्नुभएको थियो । १९ पटकको ग्राण्डस्लाम विजेता जोकोभिचले विम्बल्डन जित्दै २० ग्राण्डस्लाम आफ्नो बनाउने योजनामा रहनुभएको छ । जोकोभिचले अब उपाधिका लागि इटालीका सातौं वरीयताका माटियो बेरेटिनीसँग प्रतिस्पर्धा गर्नु हुनेछ ।