कृष्णराज शाक्य
साउन २, संखुवासभा ।
नेपाली काँग्रेस संखुवासभाले प्राकृतिक विपद्मा परेकालाई सहयोग गर्ने उद्देश्यले स्थापना गरेको नेपाली काँग्रेस बिपद् राहत कोषमा संखुवासभा– अमेरिका जनसम्पर्क समितिले रकम सहयोग उपलब्ध गराएको छ । संखुवासभा घर भइ अमेरिकामा विभिन्न पेशा व्यवसायमा संलग्न रहेका नेपालीबाट रकम संकलन गरि उक्त रकम उपलब्ध गराइएको संखुवासभा–अमेरिका जनसम्पर्क समितिका अध्यक्ष कृष्णराज गिरीले बताए । उनले प्राकृतिक विपद्बाट पीडितलाई तत्काल राहत उपलब्ध गराउन उक्त रकम पठाइएको र थप रकम संकलन हुने क्रम जारी रहेकाले सहयोग गर्न चाहने दाताहरूलाई थप सहयोगको समेत आग्रह गरिएको जानकारी दिए ।
कोषमा यसअघि विश्व किर्तिमानी आरोही मिङमा शेर्पाले १ लाख, काँग्रेस नगर सचिव रबिन गौतमले ५ हजार, नेबिसंघका केन्द्रिय प्रतिनिधी अनुज चापागाईले ५ हजार गरि हालसम्म ३ लाख ७ हजार ३ सय ६८ रुपैयाँ जम्मा भइसकेको नेपाली काँग्रेसका जिल्ला सचिव तथा राहत कोषका संयोजक निरु तामाङ्ग बस्नेतले जानकारी दिइन् ।
संकलित रकमबाट शिलिचोङ् पहिरो पीडितलाई ७० हजार बराबरको अत्यावश्यक सामग्री खरिद गरि पठाइएको काँग्रेस जिल्ला सभापति दिपन कुमार श्रेष्ठले जानकारी दिए । पीडितका लागि प्रदेश सरकार र पूर्वराज्यमन्त्री दिपक खड्काबाट बिहीबार हेलिकप्टर मार्फत खाद्यान्न लगायत अत्यावश्यक सामग्री राहतस्वरुप उपलब्ध भएको शिलिचोङ्ग गाउँपालिकाले जनाएको छ । असार २७ गते शिलिचोङ १ बेसिन्दामा गएको पहिरोमा परि ११ जना बेपत्ता छन् भने उद्धार गर्ने क्रममा एक जनाको ज्यान गएको छ । पहिरोबाट ८२ घरधुरीका करिब ४ सय विस्थापित भएका छन् ।
मा प्रकाशित